У архіве захаваліся прозвішчы першых рабочых: Т. М. Патоцкая, І. С. Шамкуць, В. Я. Януць, М. П. Кульгавік, А. Н. Савось і інш. Ім давялося рамантаваць і прыстасоўваць памяшканні, а шыць – часцей гэта значыла перашываць з ваеннага абмундзіравання. У канцы 1945 года на фабрыцы меліся 19 швейных машын розных марак на нажным прыборы. Работа швейных цэхаў была арганізавана ў дзве змены. У першую змену працаваў цэх індывідуальнага пашыву, у другую – цэх масавага пашыву. У 1950 годзе колькасць працуючых дасягнула 269.
Міністэрствам лёгкай прамысловасці БССР у 1953 годзе было прынята рашэнне аб будаўніцтве ў г. Баранавічы новага вытворчага корпуса швейнай фабрыкі. У ліпені 1957 года адбылося адкрыццё цяперашняга будынка фабрыкі па вул. Войкава, 2. Спецыялістамі-арганізатарамі вытворчасці былі Н. С. Носава (Мароз), В. З. Галябовіч, В. Т. Патоцкая, В. А. Жыткоўская, А. М. Калоша і інш. З 1960 года пачаўся новы этап развіцця фабрыкі, на якой асвоена новае абсталяванне. У 1961 годзе дэлегатам ХХІІ з’езда КПСС была майстар змены Вольга Андрэеўна Васілевіч. Званне калектыву камуністычнай працы прысвоена змене, якой кіравала Зінаіда Аляксееўна Давідовіч.
У 1970 годзе фабрыцы прысвоена званне прадпрыемства высокай культуры вытворчасці. Работы рацыяналізатара С. К. Засімовіча дэманстраваліся ў Маскве на ВДНГ і адзначаны бронзавым медалём. Ганна Іванаўна Кунцэвіч узнагароджана знакам “Отличник изобретательства и рационализации 1973 года”.
У жніўні 1974 года да 30-годдзя з дня заснавання прадпрыемства фабрыцы было прысвоена імя двойчы Героя Савецкага Саюза Сяргея Іванавіча Грыцаўца (1909–1939), ураджэнца вёскі Бараўцы Навагрудскага павета (цяпер Баранавіцкага раёна). У гэты час фабрыка мела свой найбольшы росквіт. Тут працавалі больш за 2000 чалавек. Сярод іх дэпутат Вярхоўнага Савета БССР Ганна Мікалаеўна Загорская, а побач працавалі Лідзія Пятроўна Кесель, Галіна Міхайлаўна Палхлебава, Вера Вікенцьеўна Даменікан, Галіна Яўгенаўна Кашуба, Святлана Філіпаўна Савось, Ларыса Міхайлаўна Несцярук, Наталля Уладзіміраўна Кораб, Валянціна Іванаўна Маёрава, Мая Ігнатаўна Сацук, Надзея Філіпаўна Лой і інш. На фабрыцы шылі 1310 тысяч школьных касцюмаў у год. Касцюмам, якія вырабляліся, быў прысвоены дзяржаўны Знак якасці.
У 1975 годзе Баранавіцкая фабрыка разам з Навагрудскай швейнай фабрыкай увайшла ў склад Баранавіцкага швейнага аб’яднання. У савецкія часы акрамя асноўнай прадукцыі фабрыкі – школьнай формы, у двух цэхах быў арганізаваны пашыў адзення для дабытчыкаў нафты і геолагаў, якое адпраўлялася на Поўнач, у Цюменскую вобласць РСФСР. З развалам Савецкага Саюза і адменай адзінай школьнай формы ў пачатку 90-х гадоў для прадпрыемства насталі цяжкія часы.
Баранавіцкая швейная фабрыка імя С. І. Грыцаўца пры правядзенні арганізацыйна-прававой рэформы ў сувязі з Дэкрэтам Прэзідэнта РБ ад 16 сакавіка 1999 года № 11 перайменаванаў Рэспубліканскае ўнітарнае вытворчае прадпрыемства «Баранавіцкая швейная фабрыка “Бараўчанка”».
17 лістапада 2009 года загадам Брэсцкага абласнога тэрытарыяльнага фонду дзяржаўнай маёмасці шляхам пераўтварэння РУВП «Баранавіцкая швейная фабрыка “Бараўчанка”» створана Адкрытае акцыянернае таварыства «Баранавіцкая швейная фабрыка».
ААТ «Баранавіцкая швейная фабрыка» з’яўляецца лідэрам беларускай швейнай прамысловасці па вытворчасці адзення дзелавога стылю для школьнікаў, а таксама мужчынскага і жаночага адзення. Сёння фабрыка спецыялізуецца на вытворчасці адзення дзелавога стылю для хлопчыкаў, а таксама выпускае шырокі асартымент іншай швейнай прадукцыі – касцюмы, пінжакі, штаны, спецадзенне, камплекты сталовай і пасцельнай бялізны. Сваю прадукцыю прадпрыемства рэалізуе праз фірменныя магазіны «Алеся» і сетку гандлёвых пунктаў горада і рэспублікі.
Акрамя айчынных спажыўцоў фабрыка забяспечвае прадукцыяй замежных заказчыкаў. У апошнія гады ААТ супрацоўнічае са шматлікімі фірмамі СНД. Актыўна вядзецца работа па прыцягненню да супрацоўніцтва фірм з Германіі, Даніі, Латвіі, Эстоніі, Польшчы, Чэхіі, ЗША і іншых краін бліжняга і далёкага замежжа. Фабрыка мае міжнародныя ўзнагароды за дасягненне высокіх паказчыкаў у галіне якасці. Сістэма менеджменту якасці сертыфіцыравана па ІСО 9001–2001.
Матэрыял падрыхтаваны ў 2014 г. Баранавіцкай цэнтральнай гарадской бібліятэкай імя В. П. Таўлая. Дрэкоўская Ірына Паўлаўна,гал. бібліятэкар чытальнай залы літаратуры па краязнаўству, Шлык Лілія Віктараўна, заг. аддзелам інфармацыйна-бібліяграфічнай работы
1. Барановичская швейная фабрика «Баравчанка» // Регионы Беларуси : энциклопедия : в 7 т. Т. 1. Брестская область : в 2 кн. Минск, 2009.Кн. 1. С. 39.
2. Барановичская швейная фабрика «Баравчанка» // Республика Беларусь : энциклопедия : в 6 т. Минск, 2006. Т. 2. С. 193.
3. Барановичская швейная фабрика // Белорусская ССР : краткая энциклопедия : в 5 т. Минск, 1979. Т. 2. С. 57.
4. Алешко, В. А. Барановичи : историко-экономический очерк / В. А. Алешко, М. И. Потемкин. Минск : Полымя, 1991. – 125 с. : ил. (Города Белоруссии). – Из содерж. : [Барановичская швейная фабрика]. С. 65–68.
5. Грыцавец Сяргей Іванавіч // Энцыклапедыя гісторыі Беларусі : у 6 т. Мінск, 1996. Т. 3. С. 165.
6. Прокопова, Л. Барановичскую швейную фабрику возглавила менеджер из Литвы : [о директоре Диане Брашишкене] / Людмила Прокопова // Intex-press (Барановичи). 2014. 12 апр.
7. Прокопова, Л. Директор швейной фабрики: “Если я сейчас себя не реализую, то когда?” : [о директоре Наталье Вячеславовне Дудик] / Людмила Прокопова // Intex-press (Барановичи). 2013. 1 июля.
8. Шубич, М. Твое становится и нашим : Барановичская швейная фабрика готова принять на работу до 200 швей благодаря российским инвесторам / Михаил Шубич // Наш край (Барановичи). 2012. 12 июля. С. 1, 5.
9. Первая ласточка: первой ласточкой в приватизации государственных предприятий республики стала продажа 26 % акций швейной фабрики в ходе аукциона, организованного Госкомимуществом // Наш край (Барановичи). 2011. 8 сент. С. 2.
10. Прокопова, Л. «Баравчанка» теперь шьёт и женскую одежду / Людмила Прокопова // Наш край (Барановичи). 2009. 7 окт. С. 2.
11. Юркевич, Е. Ветер перемен. Что принесет он «Баравчанке»? / Елена Юркевич // Заря. 2008. 7 авг. С. 6.
12. Плавсюк, Т. Шить не перешить / Татьяна Плавсюк // Шаг (Барановичи). 2007. 30 мая. С. 4.
13. Волынец, А. Блеск и нищета «Баравчанки»/ А. Волынец // Наш край (Барановичи). 2003. 1 апр. С. 1.
14. Гиль, С. Высокая марка с датской этикеткой / Светлана Гиль // Наш край (Барановичи). 2002. 8 июня. С. 2.
15. Белый, А. Выгодное партнерство / Алексей Белый // СЭЗ. 1999. № 5/6. С. 17.
16. Данович, М. Технический прогресс: внедрение нового / М. Данович, П. Нагнибеда // Знамя коммунизма (Барановичи). 1974. 16 нояб. С. 2.
17. Черсунова, Г. Если ты передовик : движение за коммунистический труд [на швейной фабрике] / Г. Черсунова // Знамя коммунизма (Барановичи). 1974. 15 нояб. С. 2.
18. Забежинская, А. Каждому – конкретное дело : партийная жизнь [на швейной фабрике] / А. Забежинская // Знамя коммунизма (Барановичи). 1974. 27 авг. С. 2.
19. Ланкина, М. Уверенной поступью : швейной фабрике – 30 лет / М. Лакина // Знамя коммунизма (Барановичи). 1974. 3 авг. С. 2.
20. Барановичская швейная фабрика. – http://www.bshf.by/